தேவையான பொருட்கள்:

புழுங்கலரிசி - ஒரு ஆழாக்கு

பச்சரிசி - அரை ஆழாக்கு

கடலைப்பருப்பு - அரை ஆழாக்கு

துவரம் பருப்பு - அரை ஆழாக்கு

கொள்ளு - ஒரு கைப்பிடி

உளுத்தம் பருப்பு - ஒரு கைப்பிடி

பாசிப்பருப்பு - ஒரு கைப்பிடி

பீர்க்கங்காய் - ஒன்று பெரியது

சின்ன வெங்காயம் - 10

பொடியாக நறுக்கிய கொத்தமல்லித் தழை - 2 மேசைக்கரண்டி

மிளகாய் தூள் - ஒரு மேசைக்கரண்டி

மஞ்சள் தூள் - அரை தேக்கரண்டி

சோம்பு - ஒரு தேக்கரண்டி

சீரகம் - அரை தேக்கரண்டி

தனியா - 2 தேக்கரண்டி

பூண்டு - 5 பல்

பெருங்காயம் - 2 சிட்டிகை

உப்பு - தேவையான அளவு

தாளிக்க:

கடுகு - அரை தேக்கரண்டி

கடலைப்பருப்பு - ஒரு தேக்கரண்டி

உளுத்தம் பருப்பு - ஒரு தேக்கரண்டி

கறிவேப்பிலை - 5

எண்ணெய் - தேவையான அளவு

செய்முறை:

புழுங்கலரிசி முதல் பாசிப்பருப்பு வரை உள்ள பொருட்களை ஒன்றாகச் சேர்த்து தண்ணீர் ஊற்றி 3 மணி நேரம் ஊற வைக்கவும்.

ஊறியதும் அதனுடன் சோம்பு, சீரகம், தனியா, பெருங்காயம், பூண்டு மற்றும் உப்புச் சேர்த்து சிறு ரவை பதத்திற்கு அரைத்துக் கொள்ளவும். பீர்க்கங்காயைத் தோல் சீவி கசப்பு பார்த்து பொடியாக நறுக்கிக் கொள்ளவும். வெங்காயம் மற்றும் கறிவேப்பிலையைப் பொடியாக நறுக்கி வைக்கவும்.

வாணலியில் எண்ணெய் விட்டு தாளிக்கக் கொடுத்துள்ளப் பொருட்களைத் தாளித்து, சிவந்தவுடன் பீர்க்கங்காய், வெங்காயம், மிளகாய் தூள், மஞ்சள் தூள், கறிவேப்பிலை மற்றும் கொத்தமல்லித் தழை சேர்த்து வதக்கவும்.

வதக்கியவற்றை மாவுடன் சேர்த்துக் கலந்து கொள்ளவும். (தண்ணீர் அதிகம் சேர்க்கக் கூடாது).

அடுப்பில் சிறிய வாணலி அல்லது தோசைக் கல்லை வைத்து சூடேறியதும் எண்ணெய் தடவி ஒரு கரண்டி மாவை எடுத்து மொத்தமாக ஊற்றவும்.(அதிகம் பரவலாக ஊற்ற வேண்டாம்).

ஒரு புறம் வெந்ததும் திருப்பிப் போட்டு, மேலே சிறிது எண்ணெய் விட்டு சிவக்க வெந்ததும் எடுக்கவும்.

சுவையான பீர்க்கங்காய் அடை தயார். தேங்காய் சட்னி, வெங்காய தொக்குடன் சாப்பிட மிகவும் சுவையாக இருக்கும்.

குறிப்புகள்:

பீர்க்கங்காய் பிஞ்சாக இருக்க வேண்டும். லேசான இனிப்புச் சுவையுடன் சாப்பிட்டால் அதிகச் சுவையாக இருக்கும்.